Tumau ona taofia mo le 14 aso i latou e to’a 6; sa afea Saina ia latou malaga

4 Fepuari 2020 : Ua fa’amaonia mai e to’aono ni tagata Samoa na malaga mai i Saina lea o lo’o mata’ituina pea i le nofoaga fa’apitoa lea ua fa’avagavaga e siakiina ai tagata Samoa uma e malaga mai i Saina mai siama o le fa’ama’i oti o le Coronavirus e pei ona o’o atu ai i le latalata i le 400 tagata Saina ua maliliu ai ma le silia ma le 6000 tagata ua a’afia ai ona o le vave o le pepesi o lenei fa’ama’i.

O ulua’i tagata Samoa na taofia i le Falema’i Fa’aitumalo i Faleolo e siakiina mo le 14 aso o ni alii seila a Samoa na ui mai i Saina lea na soso’o ai ma ni fanau a’oga se to’alua a Samoa mai Saina lea foi o lo’o i le nofoaga lava lea i le Falema’i Fa’aitumalo i Faleolo e sailia ai pe le’o iai ni siama o lenei fa’ama’i mata’utia o omai ma i la’ua, lea na fa’aalia e fa’apea e le’o iai ni auga o lenei fa’ama’i na va’aia ia i latou uma nei.

O i la’ua e atoa iai le to’aono o tagata o lo’o faia iai su’esu’ega o se ulugalii o se tama’ita’i Samoa ma lona to’alua lea foi na ui mai i Saina ma o lo’o mata’ituina foi mo le 14 i Faleolo i le taimi nei. I ni tala mai atunu’u mamao ua fa’aalia ai o lea ua maua le vaila’au e mafai ona tineia ai le siama lenei o le coronavirus, peita’i o lea ua silia ma le 15 atunu’u o le lalolagi lea ua pepesi atu iai ona o tagata o nei atunu’u na o latou asia le aai lenei o Wuhan i Saina ma toe foi ma ave lenei siama i o latou atunu’u.

By : Marieta Heidi Ilalio

Facebook Comments