Fa’alia e Malele Paulo o ia e le tausami eleni, atoa le 5 aso e le o ‘pauna’, manaomia se fomai

4 Fepuari 2020 : O le taeao o le aso Gafua nei na toe tutula’i ai i luma o le Fa’amasinoga Maualuga ia Malele Paulo ma Lema’i Faioso Sione e seti ai e le Fa’amasinoga Maualuga se aso e tu’uina atu iai le iloiloina o le la talosaga mo le tatalaina o i la’ua i tua.

Na tula’i mo i la’ua nei ia le alii loia ia Tufuga Fagaloa Tufuga e sui tulaga i le tama’ita’i loia ia Unasa Iuni Sapolu lea o lo’o tula’i mo i la’ua nei, peita’i o lo’o malaga i le taimi nei.

Na toe tolopo ai e le afioga i le Fa’amasino ia Leiataualesa Darryl Clarke ia le mata’upu a Lema’i ma Malele mo le aso 17 o Fepuari e iloilo ai le la talosaga e tatalaina o i la’ua i tua e pei ona fa’aui atu i le la loia. Peita’i ina ua tu’u le avanoa e le afioga i le alii Fa’amasino ia i la’ua nei pe e iai se vaega e fia saunoa ai, na fa’ailoa ai e Malele po’o King Faipopo i lana afioga i le Fa’amasino, ua atoa le vaiaso o fiu e tauanau le pulega o le to’ese pe mafai ona ave o ia i le falema’i ae le gata foi i lea ua atoa le lima (5) aso e le’i maua sana pauna (meaai) ona o ia e le ‘ai eleni, e totoa’ava ai (se’i tulou).

Na tali faitau le afioga i le Fa’amasino ia Leiataualesa e fa’apea, o atugaluga uma nei e tatau ona fa’ailoa i lana loia ina ia fa’ao’o atu i luma o le Fa’amasinoga Maualuga e iloilo ma faia iai se fa’ai’uga. Ua toe tolopo ai mo le isi lua vaiaso le mata’upu fa’asaga ia i la’ua nei e fofogaina ai le la talosaga e tatala i la’ua i tua e fa’atalia ai le la fa’amasinoga, ona o lo’o la te’ena uma le moliaga e pei ona molia ai e le itu a Leoleo, o le taupulepule e fa’ao’o le oti i le ta’ita’i o le atunu’u, po’o le afioga i le alii Palemia, susuga Tuilaepa Sailele Malielegaoi.

E to’atolu ia i latou o lo’o molia i le mata’upu lava lea e tasi ia le alii o Taualai Leiloa Tuilaepa lea foi na vala’auina i le aoauli ole aso Gafua o le vaiaso nei,  lana mata’upu peita’i o lea ua toe tolopo mo le Aso Faraile o le vaiaso nei.

By : Marieta Heidi Ilalio 

More from ALL FEATURED LOABAY SAMOA-PACIFC NEWSLINE

---