A’afiaga o le eletise i Upolu pe afai ae le lava le suatimu

Tologata Lupematasila Tile Le’ia; EPC General Manager

I le aoauli o le aso Lulu o le vaiaso nei i se fonotaga a le ‘au tusitala ma le afioga i le alii pule o le Fa’alapotopotoga o Malosi’aga Tau Eletise a Samoa, le EPC, na saunoa manino ai le afioga ia Tologata Lupematasila Tile Le’ia e fa’ato’ese i le atunu’u ona o le motusia fa’afuase’i o le eletise i le afiafi o le Aso Gafua lea na a’afia uma ai le motu o Upolu.

Fa’ailoa e Tologata e fa’apea, o le natura lava nei o fesuia’iga tau aemaise o le malolosi o le ‘emo o uila ma le papa o faititili lea na mafua ai ona a’afia le afi tele i Fiaga, ui na fausia lenei afi e mafai ona sapalaiina atoa le eletise mo le atunu’u atoa, peita’i ona o le malosi tele ma le maualalalo o le emo o le uila ma le papa o faititili lea na mafua ai ona mu se tasi o ki e mafai ona ola atu ai le eletise i le atu Lefaga, Mulifanua, Leulumoega ma isi vaega o afio’aga tau lalata ane iai.

O le taimi nei o lo’o aumai ai lapata’iga mai le Pulega o le Malosi’aga Tau Eletise i le atunu’u ina ia tapenapena pea ona o lo’o iai le tulaga o le eletise i Upolu nei i se tulaga o fa’alavelave tutupu fa’afuase’i (state of emergency) o lona uiga e i se tulaga e fa’asoasoa le eletise pe afai e le lava le suatimu i lenei vaitau.

Ua fa’amalulu mai ai foi le pulega i nisi o aiga ma tagata lautele aemaise o pisinisi ua fa’aleagaina ni mea totino ona o le motusia fa’afuase’i o le eletise, e le mafai ona totogiina e le Pulega ma le fa’alapotopotoga meatotino nei ona o lo’o manino lava i le Tulafono, se’i vagana o ni galuega na faia e le EPC ae ua fa’aleagaina ai ni meatotino ona fa’ato’a mafai lea ona taga’i le fa’alapotopotoga i le tulaga lea.

By : Marieta Heidi Ilalio

Facebook Comments