Talosaga se tinā matua ile Faamasinoga Maualuga; mo se avanoa o lana tama

Grandmother makes a court plea, requesting bail for Fotu Mo’a; who is one of the 11 people remanded in custody; on charges of narcotics possession – following the police raid at Faleatiu.

9 Tesema 2019 : Na faate’ia tolaulauga o fa’amasinoga na faatinoina e le afioga i le alii Faamasino ia Leiataualesa Darryl Clarke ile taeao ole aso Gafua nei lea na tutula’i ai i latou e 11 lea o lo’o molia i moliaga o le fa’afaileleina o la’au fa’asaina o mariuana, o le umia o mariuana, o le umia o la’au malosi atoa ai ma le umia fa’asolitulafono o la’au malosi, e ala i se osofa’iga a leoleo lea na fa’atinoina i le afio’aga o Faleatiu i le 4 vaiaso ua tuana’i atu.

O i latou uma nei e le’i molia fa’atasia e le itu a leoleo ona e eseese uma vaega o Faleatiu na maua mai ai i latou nei. O i latou nei e aofia ai Kilifi Lealaitagomoa, Senerita Maluolefale, Malaesaili Sinapati, Alisa Sinapati, Fotu Peipi Mo’a, Fereti Fereti, Parataiso Toailoa, Uili Manuleleua, Tuana’i Ioka, Iakopo Iakopo ma Faauea Faavae. Mai i lenei to’a 11, o loo tulai le tamaitaitai loia o Treena Atoa mo Fotu Peipi Mo’a, Josie Sapolu oloo tulai mo Kilifi, faatasi ai ma Leuluaialii Tasi Malifa oloo tulai mo Iakopo Iakopo ma Faauea Faavae. Na talosaga le alii loia a le to’a 2 lea (Iakopo ma Faauea) mo se avanoa e toe tatala ai tua i la’ua nei, e talia ai taualumaga o le Faamasinoga, ma ua tuu iai le avanoa ina ia oo atu ile aso Faraile nei, 13 Tesema ua failaina lenei talosaga.

Ua toe tolopo mo le aso Gafua 16 Tesema lenei mataupu a o tau sailia ni loia a nisi oi latou nei e to’a 11, ma na saunoa foi le afioga ile alii Faamasino ia Leiataualesa Darryl Clarke, e le agavaa i latou nei mo se fesoasoani mai ile Malo poo le legal aid, mo le totogiina o ni a latou loia, ona o tulaga i moliaga o loo tuuaina ai i latou.

Ae o le mae’a ai ole saunoaga a le afioga ile alii Faamasino, sa tulai ai loa se tasi o tina matua pe a ma le 75 tausaga, ole grandmother ole alii o Fotu Mo’a ma talosagaina se avanoa e toe tatala mai ai i tua lenei alii, ona na o ia e faamoemoe iai le tausiga o lenei tina matua.

Sa tali fuaitau le afioga ile Faamasino ile tina ma faailoa iai, e tatau ona faaooina atu lenei talosaga, e tauala atu ile tamaitai loia ia Treena Atoa, oloo tulai mo Fotu.

O lenei osofa’iga e pei ona iai moliaga oi latou nei e to’a 11, lea ua fa’amauina o se osofa’iga pito i tele lea o la’au mariuana maua mai ai lea e o’o atu i le 10,000 le faitau aofa’i atoa ai ma le anoano o lau mamago ma fatu mariuana fa’apea ai foi ma la’au malosi ma utu tau lea na maua uma mai i le osofa’iga lenei a leoleo.

By : Hannah Sila

LOABAY NEWSLINE

Facebook Comments