Tolopo lauina o se faasalaga falepuipui o se tinā; ulugalii molia ile umia o fuala’au faasaina

Christina Schuster, tulai ile Faamasinoga Maualuga ile aso 27 Novema 2019.

Sentencing for Christina Schuster, a mother who has been found guilty of possession of an illegal substance; has been adjourned until January 2020, to allow for caregiving arrangements for her 3 children. Mrs Schuster’s husband is already serving a 4 year jail sentence for a similar charge.

28 Novema 2019: O le aoauli o le aso Lulu o le vaiaso nei lea na tula’i ai i luma o le Fa’amasinoga ia le tina ia Christina Schuster aua se fa’ai’uga a le Fa’amasinoga Maualuga i ona moliaga o le umiaina o fuala’au fa’asaina o le mariuana e pei ona ia te’enaina ina ua molia o ia e le itu a leoleo.

O Christina na molia fa’atasi ma lona to’alua ia Jeffery Schuster, lea ua faa-falepuipui nei mo le umi e 4 tausaga ina ua ia ioeina ona moliaga o le umiaina fa’asolitulafono o la’au fa’asaina o le mariuana i se osofa’iga a leoleo na faia i lo la fale i Nu’u-Fou i le masina o Tesema o le tausaga ua mavae.

O aofa’iga o mariuana na maua i le fale o lenei ulugalii ina ua osofa’ia e leoleo ma fa’amaonia mai e le Ofisa Su’esu’e Fa’asaienisi a Samoa, 81 lala mariuana e tusa lona mamafa ma le 186.9 kalama, 320 tama’i taga pepa iila o lo’o iai lau lusi o mariuana e tusa lona mamafa ma le 1,434.7 kalama, lau lusi o mariuana e tusa lona mamafa ma le 28.7 kalama, 24 sikareti mariuana na tu’uina i totonu o se foil e tusa lona mamafa ma le 117.8 kalama atoa ai ma se oga mariuana e leai ni lau.

I taualumaga o lenei mata’upu i le taimi o le iloiloga ina ua te’ena e Christina ona moliaga ma ta’ua ai o ia e nate leiloaina ma ni tulaga tau fefa’atauta’iga o mariuana o faia e lona to’alua. Na ia ta’ua o ia e tele ina ‘ova ma e manava atu lava moe ma e le momoe foi ma lona to’alua i le tele o taimi.

O mariuana uma nei na fesiligia ai Christina pe aisea e le’o iai se malamalama’aga iai a’o lea na tanuma’i uma i lalo o le la fa’amalu ma lona to’alua ae na ia fa’aalia o ia e le momoe ma lona to’alua ma e se a se a foi a alu i tua o se umukuka e fai se meaai pe fai ni fe’au masani ona e tele ina faigaluega.

O se tulaga e le’i talia e le fa’amasinoga ona na saunoa le afioga i le Fa’amasino ia Leiataualesa Darryl Clarke, e faigata ona talia lea ituaiga fa’amatalaga na faia e Christina i lana molimau ona o la e nofo ai i le la fale ma lona to’alua ma e tatau ona ia iloa mea uma o lo’o tutupu i lo latou fale i le tele o taimi.

O le ala lea na fa’amaonia ai loa e le afioga a Leiataualesa ia moliaga fa’asaga i le tina ia Christina ma fesiligia ai loa o ia i le aoauli analeila pe o le a se umi o se taimi e mafai ona fetu’una’i ai ma se isi o lona aiga e uiga i lana fanau ona o le fa’asalaga lea o le a tu’uina atu e le Fa’amasinoga ia te ia, o se fa’asalaga fa’afalepuipui.

Na tali Christina, o lona tamā o lo’o malaga i fafo ma e fa’ato’a taliu mai i le masina o Mati, peita’i fa’aalia e Leiataualesa e le mafai ona fa’atalia e le fa’amasinoga le umi lena e tu’uina atu ai se fa’asalaga mo ia. O lea ua fuafuaina ai loa le aso 31 o le masina o Ianuari o le tausaga fou e fofogaina ai le fa’asalaga a le fa’amasinoga mo lenei tina, lea ua falepuipui lona to’alua, peita’i e iai le la fanau e to’atolu.

By : Marieta Heidi Ilalio

LOABAY NEWSLINE

Facebook Comments