E oo atu ile 60 tui puipui ua aveesea mai ise falemai tumaoti; a’o faatino suesuega

[Photo : image file]

26 Novema 2019 : A’o iai pea le atunu’u i faigata ma fa’anoanoaga ona o le fa’ama’i oti o le misela e pei ona a’afia ai ma maliliu ai le o’o atu i le 32 o tagata, ae o lea ua fa’aalia mai e le Matagaluega o le Soifua Maloloina e ala i se fonotaga ma le ‘au tusitala, le su’esu’eina o se nofoaga tuma’oti lea na fa’atautaia ai ni tui puipui o le misela.

O nei tui puipui ua fa’aleagaina uma ona o le popolega o le matagaluega i le le puipuia lelei o nofoaga na tu’u ai nei tui ma e le’i iai se fa’atagaga mai le matagaluega e fa’aaogaina ai. O lenei nofoaga tuma’oti e fa’apea na fa’atautaia ai e i latou e to’atolu sa faigaluega muamua i le auaunaga fa’asoifua maloloina ia ni tui puipui o le misela mo le atunu’u e aunoa ma se fa’atagaga mai le soifua maloloina pe o saogalemu ia nei tui puipui.

Saunoa le Ofisa Sili o le Matagaluega o le Soifua Maloloina ia Leausa Dr Take Naseri e fa’apea e o’o atu i le 60 tui puipui lea na ave’esea mai i lenei nofoaga tuma’oti ma o lo’o su’esu’eina nei i latou nei e to’atolu e aofia ai ni tausi soifua e to’alua ma se fa’atosaga se to’atasi.

O nei su’esu’ega na saunoa Leausa o le a tilotilo i le si’osi’omaga o lenei nofoaga ma le auaunaga na tu’uina atu e aunoa ma se fa’atagaga mai le Matagaluega. E iai se nofoaga tuma’oti fa’apenei lea ua mae’a ona su’esu’eina lelei ma ua uma foi ona avatu le fa’atagaga mai le Matagaluega e latou te fa’atinoa ai tui puipui mo tagata lautele aua lava lenei fa’ama’i o le misela.

O le taimi nei o le fainumera lava ia o tagata maliliu ma e tele lava i nai fanau iti ua 32. O le aofa’iga o i latou lea ua mae’a togafitia mo lenei fa’ama’i pe ua a’afia i lenei fa’ama’i ua o’o atu i le 2,194 i totonu o le 24 itula ua mavae.

O le taimi nei oloo iai nai fanau iti ma pepe lea o lo’o i se tulaga tigaina i le falema’i tele i Moto’otua ona o lenei fa’ama’i ma o le tele o gasegase misela ua toe tete’a uma i tua i aiga ua manuia i togafitiga sa fa’atino ai.

By : Marieta Heidi Ilalio

LOABAY NEWSLINE

Facebook Comments