E 10 tausaga fa’aopopo; faamatalaina osofaiga ise fale na o tamaiti na iai, meatotino $27,000 le tau.

Aniseko Vaelei [file image]

“Aniseko is by no means a stranger to the Courts..commencing with appearances tracing back to Youth Court..” says Justice Tafaoimalo of Aniseko Vaelei; who was sentenced on Friday to an additional 10 years in prison for 15 charges including robbery; possession of an unlawful weapon, assault and other charges.

22 Novema 2019 : O le aoauli nei lea na fofogaina ai se fa’ai’uga a le Fa’amasinoga Maualuga fa’asaga i moliaga e 15 o le talepe fale, gaoi, fa’aaupegaina i se aupega mata’utia, fa’ao’omanu’a ma le fao meatotino lea na molia ai le alii o Aniseko Vaelei, o se alii pagota lea na sola i tua ma le to’ese i le amataga o le tausaga ma fa’atino ai nisi o soligatulafono, lea e pei ona a’afia ai le o’o atu i le to’aono o tagata.

I tolaulauga o lenei mata’upu e pei ona fofogaina i luma o lana afioga i le Tama’ita’i Fa’amasino ia Tafaoimalo Leilani Tuala Warren na fa’aalia ai mai lenei to’aono o tagata na a’afia, e aofia ai ma ni se tamaititi e fitu tausaga ma se teineititi e fa tausaga lea na molimauina gaioiga a Aniseko ma le isi alii pagota na la sosola fa’atasi i tua i le masina o Fepuari o le tausaga lenei a’o faia se faiga lotu a pagota sa pu’eina i le malumalu lava a le to’ese i Tafa’igata.

O le osofa’iga lenei e pei ona faia e Aniseko ma se isi pagota i Moamoa na tu’ua ai na’o tamaiti nei e to’alua laiti ae o o la matua e fa’atau ma e fo’i atu ua to’esea meatotino e o’o atu lona fa’atupega i le $27,000 tala Samoa.

E le gata i lea o le isi itu ogaoga o osofa’iga a Aniseko ma le isi alii pagota lea o lo’o sailia pea ia Pati Chong Nee o lo’o fa’aalia ai e fa’apea na o la osofa’ia ai se ulugalii Saina i Vailoa, Faleata i se aga’ese a’o lo’o matamata mai iai si a la fanau e to’alua lea na tau fai tamomo’e i totonu o a la potu ma loka mai ona o le fefefe.

O lena osofa’iga i Vailoa i le faleoloa ma le fale o le ulugalii Saina lenei na to’esea mai ai se tinoitupe e $60,000 tala Samoa ma e na’o le $10,000 na toe maua ina ua pu’eina e leoleo Aniseko.

O le tu’ufa’atasiga o tupe ma meatotino na ave fa’agaoia e Aniseko ma le isi alii pagota na o la sosola fa’atasi mai i tua mai le to’ese ia Ianuari o le tausaga nei e o’o atu i le $90,000. I le lauina o le fa’ai’uga na saunoa ai le afioga i le Tama’ita’i Fa’amasino ia Tafaoimalo e fa’apea, e le fou lana silasila ia Aniseko ona sa amata mai lava ona molia atu Aniseko a’o Fa’amasino i le Fa’amasinoga o Tupulaga lea lava ua o’o lava i le Fa’amasinoga Maualuga o lo’o molia atu lava ma ua le misi se tausaga.

Saunoa Tafaoimalo e tele ni polokalame na taumafai le fa’amasinoga e ave iai Aniseko e suia ai lona olaga, peita’i ua siliga taliiseu ma o le tali lava o le to’ese mo Aniseko. Na toe lapata’i ai Tafaoimalo ia Aniseko afai ae magalo mai i le tele o tausaga o le a ia tuliina i le to’ese, ua tatau loa ona suia lona olaga ma avea o se tagata lelei ma toe mafaufau i le tele o ana soligatulafono leaga na faia lea na lamatia ai le soifua o nisi o le atunu’u.

E 10 tausaga lea ua tu’uina atu e Tafaoimalo e tuliina e Aniseko mai moliaga uma nei e 15 e pei ona fa’amaonia mo ia ma e fa’ato’a tuli pe a mae’a ona tuli lona fa’asalaga mai isi mau soligatulafono lava fa’apenei i le to’ese i le taimi nei. I le taimi na tu’uina atu ai le avanoa e Tafaoimalo ia Aniseko e faia ai sana fa’amatalaga sa ia talosaga ai pe mafai ona maua se avanoa e loka ai o ia i le Ofisa o Leoleo i Apia, ona o Tanumalala i le taimi nei sa ia ta’ua e fai sina pologa o lona olaga i le fasi so’o e leoleo, e ta’i lima aso fa’ato’a ta’ele, e feanu i ana meaai (se’i tulou) ma e moe i le sima e leai se aluga ma se ie afu.

Sa poloaiina e Tafaoimalo ia le loia a le itu a leoleo ina ia taga’i i fa’asea nei e pei ona tu’uina atu e Aniseko ma su’esu’eina ma afai ae moni ia e tatau ona faia se tagi a Aniseko fa’asaga i leoleo o le to’ese.

By : Marieta Heidi Ilalio

LOABAY NEWSLINE

Post Views: 813