Fitu vaiaso o le a nofo sala ai ile toese i Tanumalala ia Malele Paulo

Aso Faraile 25 Oketopa 2019

In a ruling that took almost 2 and a half hours to deliver; Judge Alalatoa Rosella Papalii sentenced Malele  Paulo to 7 weeks jail term; for criminal libel. 

O le aoauli nei lea na fofogaina ai i luma o le Fa’amasinoga Fa’aitumalo le mata’upu fa’asaga ia Malele Paulo po’o King Faipopo e pei ona iloa ai e le to’atele o tagata, i moliaga o le faia o tusitusiga e leai ni fa’amaoniga e ta’uleagaina ai le tamali’iaga o le isi tagata (Criminal Libel).

O lenei mata’upu na fofogaina i luma o lana afioga i le Tama’ita’i Fa’amasino ia Alalatoa Rosella Papalii. E lua vaega o lenei mata’upu o le fa’aiuga pe e talia le talosaga a Malele na tu’uina atu i luma o le Fa’amasinoga i le masina o Aukuso e toe suia ai lana tali mai le ioeina o le moliaga lea e tasi i le toe tete’e iai.

I le fa’ai’uga e itula atoa a le afioga ia Alalatoa na ia ta’ua ai o mafua’aga na fa’ailoa e Malele na mafua ai ona malie e ioe i le moliaga lea e tasi ona na fa’apea o le a fa’aleaogaina le mata’upu lenei fa’asaga ia te ia i luma o le Fa’amasinoga. Na ta’ua ai e Alalatoa, e le’o mama le taga’i a le Fa’amasinoga i lana mata’upu ma e te’ena lana talosaga lenei ona o le a tele ai fua le taimi ma’umau a le Fa’amasinoga e alu ai ma le isi vaega e le’o se fa’amasinoga e pule lava ia i le taimi e ioe ai pe tete’e foi.

I le lauina o lona i’uga na tu’uina atu ai e Alalatoa ia Malele le fitu vaiaso e nofo sala ai i le to’ese i Tanumalala ina ia avatu ai se fe’au taua i tagata e aua le fa’aaoga seseina le sa’olotoga e fa’aali ai lagona ma finagalo, o lea sa’olotoga e iai pa puipui ma e le so’ona tafili saunoa ai e pei ona faia e Malele ma ua tagatavaleina ai le tamaliiaga o le afioga i le alii Palemia o Samoa e pei ona tagi i lenei mata’upu.

O le isi itu na taga’i ai le Fa’amasinoga, o lea na tatala i tua Malele e fa’atali ai taualumaga o le mata’upu lenei i ana ata na tapu’e na faifai ai i le Palemia, peita’i na toe tapu’eina foi nisi ata ma toe fai ai lava foi fa’amatalaga nei o le fasioti tagata, o le pepelo ma le aumai fa’anana o fana i Samoa, ae maise ai lava o tu’ua’iga i le tagatavaleina o le sa avea ma Minisita o Samoa i tausaga ua tuana’i ia Luagalau Leva’ula Kamu.

O lenei fa’ai’uga na fa’aalia e Alalatoa, e ta’u atu ai i tagata, e le’o ni feso’ota’iga na faia e fa’aali ai ni uiga fa’apenei e fa’aleaga ma fasiotia ai le tamaliiaga o le isi tagata o le isi itu e fa’aalia ai lava e le’o ano Malele i tu’utu’uga na tatala ai o ia i tua e fa’atalia ai taulumaga o lenei mata’upu e ala i le toe tapu’eina o nisi foi ata ma tu’u i luga o lana itulau o le Facebook. I nisi o tu’utu’uga na poloaiina ai e Alalatoa le tu’uina i lalo e Malele Paulo o ata uma na ia tapu’eina i luga o le Facebook ma le Youtube e fa’aleagaina ai le Palemia o Samoa e ala i fanua ma isi uma vaega ma fa’atonuina le itu a Leoleo ina ia tu’uina atu se telefoni e fa’atino ai e Malele lea tulaga a’o iai i le to’ese mo le fitu vaiaso.

O le fitu vaiaso lea na fua lava e Alalatoa i luga o le fa’asalaga maualuga o lenei moliaga o lo’o iai e 175 iunite pe tolu masina fa’afalepuipui. Peita’i ina ua mae’a le fofogaina o le fa’ai’uga o le mata’upu a Malele na fa’aalia ai e lana loia ia Unasa Iuni Sapolu i fafo o le potu Fa’amasino le le fetaui o lenei fa’ai’uga ona ua atagia ai ua le fa’atauaina le aia tatau o tagata soifua e fa’aalia o latou talitonuga ma le sa’olotoga e fa’aali ai lagona.

Fa’aalia foi e Unasa, e le gata i lea o lona talitonuga o feso’ota’iga fa’aonaponei o se falea’oga sili lea mo tagata aemaise o tupulaga ina ia fa’aalia ai manatu i auala e tatau, peita’i e fa’anoanoa lava ona o le i’uga e pei ona faia ia Malele.

Mo le silafia e le ‘au fa’afofoga ma le ‘au faitau, o lo’o fa’atalia foi taualumaga o se isi foi mata’upu fa’asaga ia Malele Paulo ma Lema’i Faioso Sione i luma o le Fa’amasinoga Maualuga i moliaga o le taupulepule e fa’ao’o le oti i le Palemia o Samoa lea e fofogaina i le aso 16 o le masina fou.

 

More from ALL FEATURED LOABAY SAMOA-PACIFC NEWSLINE

---