Tuuaiga ole taufa’asese ma le taufaavalea i fanua: tālia ni faamatalaga mai i e na aafia

Na tutula’i se ulugalii e suafa ia Ele Isaia ma Emani Tulua i luma o le Fa’amasinoga Fa’aitumalo i le lua vaiaso talu ai,  ona o moliaga o le taufa’aseseina o ni tagata e ala i ni fanua. O lenei mata’upu e pei ona saunoa iai le tama’ita’i loia o lo’o su’esu’eina o le itu a leoleo ia Rexona Titi o le a toe tu’u atu mo le aso 8 o Oketopa ona o lo’o tau saili mai pe to’afia ni tagata na mafatia ai i soligatulafono o le maua o tupe i auala taufa’asese. O lenei mata’upu o lo’o fa’aalia e le itu a leoleo e fa’apea o lo’o tu’ua’ia ai le tama’ita’i lenei ma le alii lea i lo la faia o ni gaioiga taufa’avalea ma taufa’asese i ni fanua i nisi o tagata o le atunu’u lea o lo’o mafatia i faiga taufa’asese nei.E le’i mafai ona tu’uina atu ni tali a le tama’ita’i o Ele ma le susuga ia Emani i luma o le afioga i le Fa’amasino ia Fepuleai Ameperosa Roma se’ia fa’amae’a su’esu’ega a leoleo po’o ai uma ni tagata na a’afia i faiga taufa’asese a le to’alua lea.I se mata’upu lava foi fa’apenei na ioeina ai foi e se tama’ita’i talavou e suafa ia Eseta Autagavaia o Vailele moliaga o le maua o tupe i auala taufa’asese lea e pei ona ia faia i ni Tama se to’alua mai Savaii ma maua ai se seleni e latalata i le $2,000. O le aso 24 o le masina fou lea ua tu’uina atu e le afioga i le Fa’amasino ia Fepuleai e lauina ai le iuga o lenei tama’ita’i i moliaga e lua o le taufa’asese e pei ona ia ioeina.