Atagia i molimau le sauāina o Justina e Kolani a’o le’i maliu

Photo [file image]

Aso Tofi 3 Oketopa 2019

Witness statements revealed frequent altercations between Kolani and a battered Justina; leading to her (Justina’s) untimely death.

O le taeao nei lea e fa ai aso talu ona amatalia le iloiloga o le mata’upu o moliaga o lo’o tu’ua’ia ai le susuga ia Kolani Junior Lam, lea o lo’o finauina e le itu a leoleo e masalomia na ia fasiotia lona lava to’alua, le tama’ita’i ia Sa’u Justina Sa’u, o le sa avea muamua ma Fa’atonu Sili o le Fa’alapotopotoga o le UTOS.

O lenei iloiloga o loo fa’atautaia i luma o lana afioga i le Tama’ita’i Fa’amasino ia Mata Tuatagaloa. O le taeao analeila na amataina i le molimau a le tuagane o Sa’u ia Leiataua Lolani Sa’u lea sa ia fa’amatalaina ai le alu atu o lona afafine ma fa’amatala atu le fasiga o Talei, le tama teine matua a Sa’u e Kolani po’o Kiuga e pei ona fa’aigoaina ai e Talei.

Na fai si vevela o finauga a le alii o Leiataua fa’apea le susuga i le alii loia a Kolani ia Komiti Koria, ona o ua to’atama’i Leiataua i nisi o fesili a Koria lea e ta’ua ai e fa’apea, e pepelo Talei i nisi o taimi ma o le mafua’aga lena e fasi ai e Sa’u, peita’i o le talitonuga a Leiataua e le mafai ona pepelo tamaiti e tautala sa’o lava i mea na tutupu ma mea na va’ai iai. O le molimau lona lua o le molimau a le tausoga teine a Sa’u ia Anne Trevor lea na ia fa’amatalaina o ia na vili atu iai Kolani i le po na tupu ai le fa’alavelave ia Sa’u.

Fa’amatalaina e le tama’ita’i ia Anne e fa’apea, o se taimi pe a ma le 3:46 i le vaveao o le aso Sa lea na tupu ai le fa’alavelave na te’i ai i le tatagi o lana telefoni, ae tilotilo atu o le numera a Justina, na fa’ate’ia o ia i le tali atu, o Kolani lea ua vili atu ma fai atu ia te ia o Justina ua pule i lona ola. Ta’ua e Anne na ia fa’afeso’ota’ia le isi foi ona tausoga teine ma ta’u iai le mea ua tupu ma na o loa i le falema’i se’i va’ai pe mo’i lea tala ona o ia e faigata ona talitonu iai. Na alu le molimau a Anne ma ia ta’ua ina ua taunu’u atu i le falema’i fa’ato’a toso mai lava lena i fafo o Justina ma le potu fa’ata ma o lona ‘ofu lanu piniki e fiafia lava e ‘ofu lea na mafua ai ona ia talitonu o Sa’u lea ua toso atu i fafo.

O se va’aiga na fa’ailoa e Anne na ia iloa ai o lo’o iai ni uno’oa i tua o lima o Justina fa’apea ma tua i le pito taumatau o lona ua ma na ia va’aia ai le pea o le tautaliga o Justina o lo’o ta’atia i luga o lona fatafata i lea taimi. Na fa’aauau le molimau a Anne ma ia fa’ailoa ai e fa’atolu ona vili atu Kolani ia te ia ma fai atu ua le mafai ona alu atu e va’ai Justina ona e leai se isi e tu’u ai le la fanau.

I le mae’a ona tu’u o le tino maliu o Justina i le fale maliu i le taeao lea o le Aso Sa e pei ona ta’ua e Anne na la o ai loa ma le tina o Justina, lona aunty ia Sofia i le fale o Justina ma Kolani i Sinamoga e taumafai e aumai tamaiti, peita’i e le’i mafai ona aumai tamaiti. O le taeao foi lea na fa’amatalaina e Anne na alu ai i tua o le nofoaga lea na fa’ailoa atu e Kolani ma tu’ua’ia na sisi ai e Justina lona ua (se’i tulou) ma tilotilo ai i le vineka lea na tautau ai Justina ma ia iloa ai e fai si maualalo o le vineka ma e fai foi si mimiti o le lala lea o lo’o tautau ai le manoa lea na tu’ua’ia e fa’apea na sisi ai le ua o Justina. O le molimau lona tolu o se tasi o tama’ita’i na faigaluega ia Sa’u ma Kolani ia Lele Fuapauna. O le tama’ita’i lenei na ia fa’aalia e le’i atoa lelei se lua masina sa faigaluega ai ia Sa’u ma Kolani ae le toe faigaluega. Sa molimau foi Lele i nisi o va’aiga na ia iloa i le va o Kolani ma Sa’u lea na ia taumafai ai e vaovao se tasi o la misa na faia i luma o le potu malolo o le fale i Sinamoga a’o le taimi lea o lo’o ma’itaga ia Justina. Na ia fa’amatalaina e o’o atu o lo’o u’u lima lua e Kolani ia Sa’u ae lulu ma o lo’o mau foi luma o Sa’u ia Kolani ma fai lava a la tauiviga. Fa’aalia e le tama’ita’i lenei e le’i mana’o Justina e fa’alavelave atu i le la misa’aga ma toe foi ai loa i le potu i le vaveao lea pe a ma le te’a o le tasi. O le molimau mulimuli i le aoauli nei o le tina ia Mele po’o Mariana lea na tausi tama ia Sa’u ma Kolani i le tausaga e 2017.

O le molimau a Mele na ia fa’aalia ai e eseese mamao lana faigaluega ia Sa’u ina ua nonofo ma Kolani i Sinamoga ma le taimi sa faigaluega muamua ai ia Sa’u a’o le taimi lea na’o Sa’u ma lana fanau i Ululoloa. I le fa’amatalaga a Mele e tolu lava misa’aga taua a Sa’u ma Kolani lea na ia tusia i lana molimau e na te fa’amatalaina ai le ituaiga ulugalii e iai le mafutaga a Sa’u ma Kolani. O le misa’aga muamua lea na fa’amatalaina e Mele na ia ta’ua ai sa faia ai se inuga pia a Kolani ma ana uo mai le LTA ae fetaui loa ma le uma atu o le fonotaga a Justina pe ua te’a le valu. Na inu fa’atasi ai ma Justina ona na fa’ailoa e Mele e ita Kolani pe afai e le inu Justina i le latou inuga o lo’o faia ma ana uo. O le mae’a o le inuga lea e pei ona fa’amatalaina e Mele na ia fa’alogoina ai o lo’o tau upu ma pisa i lea po. Sa ia fa’alogoina o vala’au atu Kolani ia Sa’u e avatu lona solo ma ia va’aia ai o lo’o fa’ata’ele mai e Pa’i po’o Justina ia Kolani ma ave iai le solo. O le isi misa’aga na fa’amatalaina e Mele na fa’alogoina o lo’o e’e Justina ma fai ia Kolani e sili ai pe ana alu atu e fasioti ia. O nei misa’aga uma e na te leiloa mafua’aga, peita’i e tele lava ina fesili ia Kolani ma fa’amatala atu e Kolani.

O le misa’aga lona lua lea na fa’aalia e Kolani ia te ia, na mafua ona o sana miti fai mai na misa Justina ma lona tina ma te’i a’e ai ae fetaui ma le tilotilo atu i ona autafa o lo’o moe fa’asaga atu Justina ma ia tuiina loa ma le gutu o Justina. O le misa’aga lona tolu lea na fa’amatalaina e Mele e i le va o Kolani ma le tama teine matua a Justina ia Talei lea na ia fa’aalia i luma o le fa’amasinoga e iai se tasi o afiafi na o atu ai Kolani ma Sa’u sa o e out ma ni meaai ma latou aai ae fa’alogo atu o fai Kolani ia Talei pe aisea e na te le fa’aigoaina ai ia ia Dad, ae peita’i na tali Talei ona o lou igoa o Kiuga. Sa ia molimau na fai atu Kolani ia Talei, a e iloa e le mafai na e fa’aigoaina a’u o Dad alu lea e eli i luga lou Tama e dad iai. Na fa’ailoa e Mele sa tagi Talei ma alu i le potu peita’i na alu atu lona tina ia Justina ma fai iai e alu e fa’ato’ese ia Kolani ina ne’i te’i ua ita. O le molimau atoa a Mele na ia fa’aalia ai, o se mafutaga e misa so’o le mafutaga a Sa’u ma Kolani ma e le’o se aiga e umi na fiafia. O le aso a taeao lea ua fa’aalia o le a amatalia ai i le molimau a le foma’i na faia le ta’otoga fa’apitoa o Sa’u fa’apea ai ma le tausi tama na iai tonu i le vaveao na tupu ai le fa’alavelave ia Sa’u.