Toatolu paleina le tofiga Faamasino mo Fanua ma Suafa

Aso Gafua 16 Setema 2019

O le vaiaso ua mavae lea na fa’amaloloina tumau ai nisi o Fa’amasino o le Fa’amasinoga o Fanua ma Suafa e to’atolu ona o nisi o fa’avae ma ta’iala ua fa’amaonia lo latou le tausisia.

Peita’i o le aoauli nei lea na fa’atautoina ai ni Fa’amasino e to’atolu o le Fa’amasinoga o Fanua ma Suafa e sui tulaga i nei avanoa taua lava e tolu mo le Fa’amasinoga o Fanua ma Suafa.

O i latou nei e aofia ai ia Leilua Opapo Soana’i, Tuautu Kalepo Tuautu ma Leu Alani Ulia.

I lana saunoaga fa’apitoa na fa’aalia ai e le afioga i le Sui Fa’amasino Sili ia Niava Mata Keli Tuatagaloa ia le taua o le tofiga lenei o le Fa’amasino o le Fa’amasinoga o Fanua ma Suafa ona o lo’o tagofia ai measina a Aiga. Saunoa Niava o measina nei o le afua’aga ma le mafua’aga lea o le olaga o so’o se tagata Samoa, o measina o lo’o afei ma tapui ai le fa’asinomaga (ma le mitamitaga) o le tagata Samoa.

I lana saunoaga fa’ala’ei’au na saunoa ai le afioga ia Niava, o le a le taumate e feagai fa’amasino fou nei ma fa’afitauli o le galuega, peita’i e tatau ona pi’iama i le Atua aemaise o le tautoga e mama ai le avega.

O nei fa’amasino e to’atolu e amatalia i le vaiaso fou o latou tofiga fa’a-Fa’amasino o le Fa’amasinoga o Fanua ma Suafa lea e saili fofo atu ai le tele o aiga ma nu’u i gasegase o lo’o feagai ai i mata’upu e le gata o suafa aemaise o ele’ele.

O Fa’amasino nei e to’atolu lea ua sui tulaga i afioga i Fa’amasino ua fa’amalolo ia Sevealii Panapa Ve’e, Lavea Siaosi Hazelman fa’apea ai ma Nanai Pologa Ioane.

Tusia : Marieta Heidi Ilalio

LOABAY NEWSLINE

Facebook Comments