Te’ena moliaga o le faaoolima i se isi tina na oo atu e piki lana fanau aoga

Photo : image file Aso Gafua 16 Setema 2019 

O le taeao nei foi lea na tula’i ai i luma o le Fa’amasinoga Maualuga ia se tasi o mafine e to’alua ai tama’ita’i o lo’o molia i moliaga o le taumafai e fa’ao’o le oti i se tagata ona o le fa’alavelave lea na a’afia ai se tasi o tina na alu atu e aumai sana fanau a’oga i le A’oga Tulagalua i Vaivase ae fa’ao’olima loa iai ni tama’ita’i i luma o le pa a le a’oga.

O lenei fa’ao’ogalima na i’u lava ina ave ai si nei tina na a’afia i le falema’i ona o ni manu’aga mai nei fa’ao’ogalima. E tauala atu i la loia ua tu’uina atu ai tali tete’e a Paepaetele Halloween Slade ma Lanuola Slade i luma o le Fa’amasinoga e pei ona fofogaina e le alii loia ia Donald Kerslake i luma o lana afioga i le Tama’ita’i Fa’amasino ia Tafaoimalo Leilani Tuala Warren. Ua toe tu’uina atu ai lenei mata’upu mo se iloiloga i le vaiaso e amatalia i le aso 11 o Me o le tausaga fou.

O lenei fa’alavelave na fa’aalia ai le tele o se a’afiaga ona o le fanau a si nei tina ua va’ai i fa’aoogalima na faia i lo latou tina aemaise o nisi o tamaiti na molimauina. Ua faia ai ma tulafono a nisi o a’oga tulagalua i le taulaga talu mai lava lenei fa’alavelave ina ia fa’amamalu le lokaina o le pa i taimi uma ina ia aua ne’i toe tula’i mai ni fa’alavelave fa’apenei i le lumana’i.

By : Marieta Heidi Ilalio

LOABAY NEWSLINE

 

More from ALL FEATURED LOABAY SAMOA-PACIFC NEWSLINE

---