Teena e Mikaele Ionatana moliaga e 3 o le gaoi; ile apitaga a Niu Kaletonia; vaitaimi o taaloga o le Pasefika

Mikaele Ionatana, i fafo ole potu Faamasino

Aso Gafua 29 Iulai 2019

Mikaele Ionatana rejects 3 charges of theft from Team New Caledonia’s lodgings, during the Pacific Games

Na tula’i mo le ulua’i taimi i luma o le Fa’amasinoga Maualuga ia le alii o Mikaele Ionatana e tali i ona moliaga e tolu o le gaoi i se tasi o apitaga mo tagata ta’a’alo o Ta’aloga o le Pasefika e pei na fa’ato’a fa’amae’a atu i le lua vaiaso talu ai.

O lenei alii e fa’apea sa ave pasi i taimi o ta’aloga e feavea’i tagata ta’a’alo ma o lo’o tu’ua’ia e le itu a Leoleo e fa’apea, i le aso 7 o le masina lenei o Iulai na aveeseina mai ai e Mikaele se telefoni o le ituaiga o le Samsung SJ2 e tusa lona tau ma le $541tala Samoa mai se tasi o potu na api ai le ‘au ta’a’alo a Niu Kaletonia.

O le moliaga lea na te’ena e Mikaele e fa’apea, o le telefoni lea na avatu e se tamaititi na volunteer i ta’aloga ia te ia. O le moliaga lona lua e fa’apea o le aso 7 foi o Iulai o le tausaga nei i Foga’a i Faleula, na gaoia mai ai e Mikaele se telefoni o le ituaiga o le Iphone 8 e tusa lona tau ma le $2,684 tala Samoa lea foi o lo’o te’ena malosi e Mikaele.

O le moliaga mulimuli o lo’o fa’apea mai le itu a Leoleo o le aso 7 foi o Iulai o le tausaga nei i Foga’a i Faleula, na ulufale fa’amalosi ai Mikaele i le potu ua fa’aigoaina o le potu numera 6 na tali ai le ‘au ta’a’alo a Niu Kaletonia e aunoa ma se fa’atagaga. O lo’o te’ena uma e Mikaele ia moliaga nei e fa’asaga i ate ia ma o le aso 5 o Aukuso o le a toe fofogaina ai se’ia fa’amae’a moliaga a le itu a Leoleo ma iloa ai se aso e fofogaina ai le iloiloga o lana mata’upu i moliaga ua ia te’enaina.

O lo’o tatala lenei alii i tua ma ua fa’atonuina e aumau i lona aiga i Fagaloa ma saini i le Ofisa o Leoleo i Apia se’ia toe iai se isi poloa’iga a le Fa’amasinoga mo ia.

By : Marieta Heidi Ilalio

LOABAY NEWSLINE

Facebook Comments