Molia se alii talavou; aveesea faagaoi o tusifolau ma isi mea totino; a le au ta’aalo mai Papua

Tele Lemalu [Photo : Facebook page]

Aso Gafua 29 Iulai 2019
Tele Lemalu, 20 years of age from the village of Afega; stands trial for 3 charges of theft, including the unlawful removal of travel documents and other personal effects from members of the Papua New Guinea team, during the Pacific Games.

O se alii talavou e 20 tausaga le matua e suafa ia Tele Lemalu na fa’ato’a tula’i i luma o le Fa’amasinoga Maualuga i le taeao analeila e tali i moliaga e tolu o le gaoi i le nofoaga lea na aumau ai ‘au ta’a’alo o Ta’aloga o le Pasefika i Foga’a i Faleula.

Fa’aalia e le itu a Leoleo e fa’apea, o le aso 9 o Iulai o le tausaga nei i Foga’a i Faleula na ulufale fa’amalosi ai lenei alii i le fale o lo’o api ai nisi o tagata ta’a’alo mai Papua Niu Kini, lea na ia te’ena. O le isi moliaga o le gaoi e fa’apea i le aso 9 o Iulai o le tausaga nei i Foga’a i Faleula, na ave fa’agaoi ai e lenei alii se HP Laptop, o se keyboard mo se komipiuta, 2 fagama’a ma se ato a’oga ma o nei meatotino e tusa lona tau ma le $4,632 tala Samoa, o meatotino a se alii ta’alo mai Papua.

O le isi moliaga o lo’o tu’ua’ia ai le alii lea o Tele i lona gaoia o ni tusifolau e o’o atu i le 12 o nisi o le ‘au ta’a’alo a Papua lea foi na ia ioeina. Sa toe fesiligia lenei alii e le afioga i le Fa’amasino o le Fa’amasinoga Maualuga ia Leiataualesa Darryl Clarke pe aisea ua ia tete’e ai i le moliaga o le alu fa’amalosi i totonu o se fale ae o lea e ioe i le gaoia o meatotino mai nei apitaga, ae na ia fa’ailoa ua ia ioeina uma nei moliaga e tolu.

Ua tu’uina atu ai le lauina o le i’uga o lenei alii talavou i le aso 20 o Aukuso ma tu’uina atu ai se lipoti mai le Ofisa Fa’anofova’ava’aia. O lenei alii e mai le afio’aga o Afega lea na ia faia se pasi pepelo e ulufale ai i le lotoa lenei na tali ai tagata ta’a’alo i Faleula ma gaoia mai meatotino e pei ona ia ioeina e aofia ai ma tusifolau o nisi o le ‘au ta’a’alo mai Papua.

By : Marieta Heidi Ilalio

LOABAY NEWSLINE

Facebook Comments