Fesoasoani mai Korea i Saute i le faaleleia o tulaga tau faigapalota mo le lumanai

Aso Tofi 30 Me 2019 

E silia i le miliona talā Amerika toeitiiti atoa le tolu miliona talā Samoa, le tau o le fesoasoani a le malo o Korea i Saute mo Samoa tauala  mai lea i le Ofisa o le Komesina o Faigapalota.

O lea fesoasoani o se faigapaaga a Samoa ma lea malo e pei ona taua e le alii Palemia susuga Tuilaepa Sailele Malielegaoi i le aso ananafi. O le tausaga 2016 ina ua maea le palota na  amata faatalanoa ai e lo tatou Malo ma le AWEB, auala faaonapo nei o loo faaogaina tele foi e isi atunuu ia latou faiga palota, lea na talosaga ai loa e le ofisa o le komesina o faigapalota lea Malo mo se fesoasoani tau faatupe ai le  poloketi faatekinolosi e faatapualaa ai le tulaga maualuga o le faatinoina o faigapalota i le atunuu.

O le faaiuga o le tausaga 2017 na tali mai ai loa Korea i Saute i le faatalauula atu a le atunuu. O ananafi na molimauina ai lea fesoasoani e ala i auaunaga, o tv screen,ma isi atoa ai la ma isi masini e tele e aoao mai ai faamatalaga, e tusa lona malosi ma le 40 gigabytes o le malosi e fua ai fesootaiga ma mafai ona teuina ai  faamaumauga lea e silia i le miliona tagata, sili atu i lo le 2 gigabytes o loo faaogaina nei e le Ofisa o le Komesina o Faigapalota e faatino ai galuega o faiga filifiliga a le atunuu.

I lenei fesoasoani o le a mafai ai i le polokalame ua maea fausia,ona siaki lava e le tagata palota ia lana resitala i luga o le initaneti i se lautusi ua fausia faapitoa mo faigapalota a Samoa, e faaogaina ai numera faalilolilo poo pin numbers.

O le a mafai foi ona sui lava e le tagata lava ia lona ata ma faamaumauga i lona tagata  luga pe a manao ai, ma e le mafai ona iloa e se isi lea tulaga, ae o le tulaga sili ona lelei o le a vave le faitauina o palota atoa foi ma le faamatu’u mai o faaiuga, o le a aveesea ai le umi ona faatali o le atunuu e pei ona iai nei.

O lenei foi poloketi ua maua ai e tagata faigaluega o le Ofisa o le Komesina o Faigapalota le avanoa e malaga atu ai i Korea e aoaoina mai ai faapitoa lava i le faiga o masini nei ua iai.

Sa faafetaia e le alii Palemia o le atunuu le malo o Korea lea sa auai mai ai le Failautusi aoao o le faalapotopotoga o le AWEB le susuga ia Kim Yongi-hi i le tuuina aloaia atu o lea fesoasoani i le malo lo tatou malo.

By : Maina Misa Fomai Papalii-Vai

LOABAY NEWSLINE 

 

More from ALL FEATURED LOABAY SAMOA-PACIFC NEWSLINE

---