Molimau le Komesina o Leoleo i le la talanoaga ma Peter Tulaga

Aso Faraile 17 Me 2019 

O le toe tolu minute ta le valu i le afiafi o le aso 15 o Ianuari o le tausaga nei na faailoa e le alii Komesina na vili atu ai se tagata i lana telefoni, e le masani i lea numera, na te le’i  faamauina foi e pei o isi numera e faailoga i le suafa o le tagata i totonu o lana telefoni.

Na faailoa e le alii Komesina o le leo o le tagata e pei e iai se mea o loo tupu, e pei o se tagata o loo popole ma
atuatuvale ma o loo mafatia pe tagi foi.

Sa faailoa atu e le na vili atu lona igoa ma faapea ai “O a’u o Peter Tulaga”.

Sa ia toe fesili atu iai “ Who are you?” Sa ia toe faapea atu “Oh we met before I’m the taro guy”.

Na taua e Egon na ia fai atu loa iai “okay”.
O le taimi lea na faapea atu ai loa Peter “Ga ou kago fasioki lo’u koalua, ga ou kago faga le ulu ma foliga”.

Ona o le te’i tele o le alii Komesina na ia taua ai sa ia faapea mai i le o lo o la talanoa i le telefoni, “Hey is this a joke? Its not funny”.  Peitai na tali atu le o loo i le telefoni “leai”
Na taua e le alii Komesina i lona mafaufau pe faapefea ona uma ona fana lona toalua o loo taatia ona vili atu lea, sa is talanoa atu iai ma faapea atu e vili le 911 ona e manatu tele i le ua aafia. Sa ia toe fesili mai iai poo fea le ua aafia, ae na tali atu ua ave e lona aiga i le falemai.
O le isi ana fesili na ia faapea atu ai i le o loo i le telefoni, poo fea la le fana, ae tali atu ua ave e
lona aiga, taua e Keil sa ia toe fesili mai fo’i i iai poo ua resitala le fana, ae na tali atu “ Ioe o loo
resitala i lona igoa.”

Sa taua foi e le alii na la talanoa, o ia ua fefe i le aiga o lē ua aafia. O le taimi loa lea na ia faailoa atu loa iai e fesootai ia Herbert Aati o loo faauluulu iai le vaega o suesuega i le matagaluega o leoleo le CID.

Na taua foi e le alii komesina i lana molimau sa faailoa atu e le ua molia o se feeseeseaiga na tupu i lo la va ma lona toalua, ona o se faanumi o loo faia e lona toalua ma sona aunty. Sa taua foi e le ua molia na taumafai e laveai mai le tamaitai ua afaina mai lona taumafai e pule i lona soifua peitai ua pa lava le fana.

Na taua e le alii Komesina pe tusa ma le 5 i le 6 minute le umi o la la talanoaga ma le alii ua molia, ma talu ai lona popole tele i le soifua o le ua aafia na maea loa lea talanoaga i le telefoni vili loa ia Herbert Aati e tatau ona sau i le ofisa i lea lava taimi, sa ia faatonuina foi le ua molia ia oo ane i le ofisa o Leoleo o lea ua faatali atu ai le alii taitai ia Herbert Aati.

By : Maina Misa Fomai Papalii-Vai

LOABAY NEWSLINE 

More from ALL FEATURED LOABAY SAMOA-PACIFC NEWSLINE

---