Silia 10 molimau, faamasinoga o Peter Tulaga; taumafai faaoo le oti ia Frysna Rimoni

Aso Lulu 15 Me 2019

Faafofoga le Faamasinoga i nisi o molimau a le itu a Leoleo i le mataupu faatatau i le alii faipisinisi o Peter Tulaga, i moliaga o le taumafai e faao’o le oti i le tama’ita’i o Frysna Rimoni.

O le aso ananafi lea na amata valaauina ai e le itu a Leoleo a latou molimau i lemataupu ma le alii o Peter Tulaga , lea o loo molia i moliaga e fa i luma o le Faamasinoga.

O le tamaita’i Faamasino ia Tafaoimalo Leilani Tuala Warren o loo faatautaia lea mataupu.  O le itu a Leoleo o loo tulai mai ai le tamaitai ia Leone Mailo, ae o Lefau Harry Schuster ma le tamaitai ia Maureen Epati Tuimalealiifano o loo tulai mo Tulaga.

E silia i le 10 moliamau a le itu a Leoleo e aofia ai uso e toalua o le ua molia ma ona tuafafine e toalua, atoa ai ma teine tausima’i e toalua ma le taitai (supervisor) o le vaega e taunuu iai gasegase tigaina faafuasei mai le Matagaluega o le Soifua Maloloina, na tiute i le afiafi tonu na tupu ai le faalavelave.

O le alii leoleo taitai o le Falepuipui i Tafaigata na agai iai le alii o Peter ina ua maea ai ona tupu o le faalavelave, faapea ai ma le uso o le tamaitai o Frysna lea na fesootai iai le alii o Peter i lea lava po sa valaauina e Leoleo ile uluai
suesuega o lea mataupu i luma o le faamasinoga. O le auva’a o faatonu poo sui o le atunuu, o i latou tonu ia o lo’o faamasinoina mea moni na tutupu o loo auai ai i lea suesuega ua faatulagaina mo le 4 aso.

I le tolaulauga o moliaga o le ua molia o lo’o faailoa mai ai e tasi le moliaga, o le taumafai e faao’o le oti i le tamaita’i ua aafia, ma le moliaga faaleoleo o le faao’o manua tuga.

E tasi le moliaga o le umia o se aupega matautia, tasi le moliaga o le umiaina o se laaumalosi e lei resitalaina faatulafono. Na faalautele mai e le itu a Leoleo la latou mau e ala lea i le valaauina o a latou molimau mo le suesueina i luma o le faamasinoga.

O loo teena uma moliaga nei e fa e le alii o Peter Tulaga. O mea na maua e Leoleo i a latou suesuega o loo taumafai ai e faamaonia moliaga nei o le taumafai e faao’o le oti ma faapea mai ai, sa taumafai le alii o Peter Tulaga e
fasioti Frysna Rimoni, sa faailoa gaioiga sa faia e le ua molia ina ia faataunuuina le faamoemoega lea. O le moliaga lea o le umia o se aupega matautia, muamua o le ua molia sa ia umia se aupega matautia e aunoa ma se mafuaaga tatau.

E tusa ai o le moliaga lea o le umiaina o se laaumalosi e lei resitalaina, o faamaoniga, sa iai lea i le ua molia se laau malosi e lei resitalaina, o le moliaga faaleoleo lea o le faao’o o manuaga tuga, ua faalia ai o le ua molia na ia
faao’o manuaga tuga i le ua aafia, ma sa faia lava ma lona faamoemoe e o’o manuaga tuga.

O uluai molimau na valaauina e aofia ai leoleo sa o latou pueina ata ma tusia le ata o le nofoaga na tupu ai le faalavelave. O le molimau a uso ma tuafafine o le ua molia, o loo faaalia ai e le uso matua le susuga ile alii faifeau ia Petelo Tulaga o se faifeau i le ekalesia Christian Church e faapea, o ia sa i lona fale i le afiafi lea o le aso 15 o Ianuari o le tausaga nei, o lona fale e i totonu o le fanua e tasi o loo iai foi ma le fale o lona tina lea o loo nonofo ai ma Peter faatasi ai ma fale o le isi ona uso ma lona tuafafine i Vailoa i Faleata.

O le mamao ese o lona fale mai le fale o lona tina pe a ma le selau mita. Sa ia faalogoina se mea e pa faapei o se atigifagu faamanogi ua uma ae ua togi i se afi ma pa ai. E le’i leva lava ae tu atu le atalii o lona uso ma faapea atu ia te ia, “Uncle o la e pisa le vaega la” sa ia agai atu loa i le fale o lona tina ma ia vaaia ai lona uso ia Paulo ma lona tuafafine o Melania o loo tutu i luma o le fale, sa ia vaaia foi Peter ua agai mai fafo male fale lea o lona tina ma faamavae atu i lona uso ma lona tuafafine mulimuli ai ona faamavae mai ai te ia, ma le tala e faapea, o ia laa alu.

E alu Peter ae ona faalogoina loa le tagata o loo augani mai e fia maua se fesoasoani mai totonu o le fale, sa ia uluai auina atu lona tuafafine ia Melania e vaai poo ai lea e i le fale lea o loo tagi e fai maua se fesoasoani. Na ia taua
sa agai lona tuafafine ma toe ulufafo mai ma le fale ma na ia vaaia foliga e le fia manao e oo i totonu, e faapena foi i lona uso o Paulo.

Sa fa’ailoa e Petelo na ia o’o lava i totonu ma ia si’i maia loa le tamaitai ua aafia. Na te lei iloa le tuga tele o manua peitai na ia faalogoina o se vaega o foliga o lea tamaita’i ’i lea sa pau atu i lona lima i le taimi na ia si’iina ai, ma ia iloa ai o le taenifo (tulou) na pau atu i lona lima.

Sa ia faatopetope atu loa i lona tuafafine e aumai la la taavale ma lona toalua e ave ai le ua afaina i le falemai.  Na ia faailoa o Peter o le ui’i o le fanau e toasefulu. E tali tutusa lelei le molimau a le faifeau ma lona uso o Paulo ma lona tuafafine o Melania lea o loo taua ai o Peter o se tagata agamalu tele e le faamisa pe fasi tagata fo’i.

O le mau a le tuafafine o le ua molia ia Melania na ia taua ai, o laua ma lona toalua na agai e ave le tamaita’i ua afaina i le falema’i, na taunuu atu ma vevesi loa foma’i i le faia o togafitiga, sa ia faalogoina o fai mai le fomai faapea “ Na faaoga muamua le mea ma’ai”.

Ina ua valaauina e le itu a Leoleo molimau mai tamaitai tausima’i e toalua faapea ai ma le taitai (supervisor) o le vaega e taunuu iai ma’i tigaina, o i latou tonu ia na taunuu iai le tamaitai o Frysna Rimoni ina ua oo atu i le falemai,sa faaalia ai e le tamaitai tausi soifua faamauina ia Freida Alesana e faigaluega i le vaega e taunuu iai mai tigaina i le falemai i Ulumatootua e faapea, pe o se taimi o le ta o le fitu i le afiafi o le aso 15 lea o Ianuari sa faigaluega ai sifi po, na o’o atu ai se tamaita’avale (taxi) o lo’o auina atu ai le tamaita’i ua afaina o lo’o taoto i totonu.

Na alu atu le tamaitai sa o atu ma le ua afaina ma faapea atu e fia maua se fesoasoani.  Sa fesiligia mo faamaumauga poo ai le igoa o le ua aafia? Ae tali atu na te le iloa.  Toe fesili  po’o le a le la faia ma le ua aafia, ae sa tali mai o le ua aafia e le masani ai ae o le uo teine a lona tuagane. Sa toe fesiligia poo le a le mea na tupu ae tali atu le tamaitai, “ Ga kakui e lo’u kuagage i le kioaka ma faga i le faga” Sa toe fesiligia foi lea, poo fea lona tuagane ae aisea fo’i ua faia ai e lona tuagane lea mea, ae faapea mai “O lo’u tuagane la ua alu i Tafaigata, ae o le ita tele o lo’u tuagane i le pepelo o le teine”.

E tutusa lelei mau a tamaita’i tausi soifua e toalua faapea ai ma lo latou taitai e faatatau i le tulaga na oo atu ai le ua aafia i le falemai atoa ai ma faamatalaga na tuuina atu e le tuafafine o Peter Tulaga lea na o’o atu ma lona toalua e momoli atu lea ua aafia i le falemai mo se fesoasoani.

O le faalavelave lenei na tupu mai i Vailoa Faleata i le aso 15 o Ianuari o le tausaga nei, lea o loo tuuaia ai le alii o Peter Tulaga i lona taumafai e faao’o le oti ia Frysna Rimoni e ala i lona fanaina lea i se laau malosi, ma taua ai ose feeseeseaiga faaleuo na mafua ai.

O le a faaauau le suesueina o lea mataupu i le aso, ma e aofia ai i molimau a le itu a Leoleo lea o le a faafofoga iai
le Faamasinoga le ua aafia e faaoga ai auala o fesootaiga faaonapo nei. O loo iai foi le faagasologa o lenei mataupu, o le aso a taeao, o le a tulai ai le alii Komesina o Leoleo, o se tasi o molimau e tusa ai o lenei taualumaga.

By : Maina Misa Fomai Papalii-Vai

LOABAY NEWSLINE 

 

More from NOTICES : COMMUNITY NEWS & UNCATEGORIZED

---