Manu’aga tugā; mafua ai le maliu o se alii talavou mai Fasitoouta; Miracle Aileone

E le’o iloa tonu le mafuaaga o le maliu ai o Miracle Iva Aileone o se taule’ale’a 20 tausaga mai le afioaga o Fasitoouta i le amataga o le vaiaso nei.

Na feutuutua’i loimata o le faanoanoa ma le mafatia o le tuafafine o le alii ua maliu ia Miracle Mercy Iva Aileone, le tamaita’i o Pelenatete Senio ina ua ia faamatala uiga o lona tuagane i lo latou aiga, e ui na ia taua e le’o iloa tonu lava poo le a le mafuaaga o le maliu ai o Miracle Mercy poo Miyoko le igoa e iloa ai e le toatele, e pei ona ua avea ai lona soifua.

Na pau le tulaga o loo manino mai i molimau a se uo mamae a Miracle Mercy o laua na agai i Vaialua e faatau se sikareti i le afiafi o le Aso Sa i se faleoloa o loo maua ai sikareti lusi, ma o i na tupu ai loa le faalavelave e pei ona masalomia ai le ua taofia e leoleo i lona fa’ao’o ai o le oti ia Miracle.

Sa oo atu le Loabay NewsLine  i le aiga o Miracle i Satui Fasitoouta mo se faamatalaga e tusa ai o le mea na tupu, peita’i na faailoa mai e le tuafafine o le ua maliu, o lona tuagane sa agai mai i tai ile afiafi o le Aso Sa e faatau, ae faate’ia i latou ina ua alu atu le tama a le tuafafine o lona tama, e feau atu ona matua e o mai latou te talanoa, ma le lilo i manatu o se faalavelave ua tupu i lona tuagane.

O le molimau a le uo a Miracle na la o i le Aso Sa, na oo atu i lumafale o le na faaoo le oti i lana uo ae valaau mai, e faapea “O lea faatoa toe vaai lava lea ia Miracle”, e lei ano lava iai Miracle o loo fai lana telefoni i lea taimi, ae faateia i le tu’i e le na faaoo le oti ma pau loa i lalo.

O le molimau a le tama e tusa ai ma faamatalaga na oo atu, e le na’o le toatasi na fasia Miracle sa iai foi ma isi tagata, ma e faapea o le kiki i lona ulu lea o loo aafia ai I se manuaga tuga i se mea maai o le seevae o le na faaoo le oti. Sa fuivai e i latou na fasia e tau faate’i ai peitai e lei manuia ma agai ai loa ave i le falemai i Leulumoega, ma le faamatalaga na pau i le vai.

Sa toe fesiligia le tamā o le ua maliu, pe iai lava se tulaga o ia tau masalomia ua mafua ai lea faalavelave ma ua oo ai le oti i lona atalii, ae sa faapea mai e lei mamao atu na avatu ai le tala e faapea o faiavā e toalua a le na faaoo le oti ia Miracle Mercy, na omai i uila ma le tagapepa o loo masalomia o se tagapepa mariuana e agai i Faleasiu. O le tala la e faapea na fao e tamaiti e toatolu i le auala le tagapepa lea, ma o loo masalo le tamā ua fasi sese ai lona atalii, i le manatu, sa iai Miracle i le faoga o le tagapepa lea, peitai o loo taua e nisi tupulaga, e lei iai le ua maliu i lea afiafi na fao ai le tagapepa.

E faagalogata le alii o Miracle i lo latou aiga ona na faapea mai lona tama o se tagata aga malie, ma e le tali i se upu, e o’o lava foi i le tuafafine o le ua maliu e misia lona tuagane ona o ia e faia uma feau a le aiga. Sa iai foi le fuafuaga o le vaiaso fou o loo faatalia ai pepa mo le malaga atu i Amerika Samoa e faigaluega ai, ae o lea ua alu.

O Miracle Mercy o le lona fa o le fanau e toafitu.  O lona igoa na mafua mai ile uluai vavega na vaaia i le malumalu o Maria Imakulata i Fasitoouta ile uluai 24 itula o le faatuuga o le eukalisitia i Samoa, lea sa faia e le ituaiga o le Divine Mercy i le Ekalesia Katoliko i Fasitoouta. E lei leva atu nei ona faamanatu le aso na tupu ai lea vavega i le aso 20 Mati 1999, ma le aso na soifua mai ai le alii o Miracle ile lalolagi le aso 18 o Mati 1999, pe a ma le lusefulu tausaga ua mavae, ae o lea ua ave le ola o le atalii i se faalavelave e lei mafaufauina e ona matua ma lona aiga o le a tupu ia te ia.

O loo fa’aauau nei suesuega a leoleo i lea mataupu, ona faatoa iloa ai lea o le aso e faamavae atu ai le aiga o Miracle Mercy Iva Aileone ia te ia.

By : Maina Misa Fomai Papalii-Vai

LOABAY NEWSLINE

More from ALL FEATURED LOABAY SAMOA-PACIFC NEWSLINE

---