MMR : Matāituina le saogalemu ole tui puipui mo le fanau iti

Ua toe amatalia le tui puipui o le MMR mo fanau a Samoa, atoa ai ma nisi o tulaga na faailoa ua tatau ona faia iai ni suiga.

[Please click link to watch video on Loabay You Tube channel : https://youtu.be/WkGDloTMlrg ]

E lei fa’afaigata lava le toe amatalia ai o le faatinoina o le tui puipui o le MMR mo fanau laiti e pei ona molimauina i le asō  i le falemai o Tupua Tamasese Meaole i Ulumotootua.

O le vaaiga masani lava i tina i le o’o atu e tui le fanau, e leai se tulaga faapopoleina, atoa ai ma le faamalamalamaina o le pepa e sainia e le tina o lona maliega e tui ai lana tama e pei ona faatino uma e tamaitai tausimai ua fitoitonu ma lea galuega.

Sa faatasi atu foi le ofisa sili o pulega i lea faamoemoe ma na ia taua ai, o tulaga taua lava o loo vaai i ai le matagaluega, o le saogalemu o le tui, o le saogalemu o le fanau faapea le aufaigaluega, atoa ai la ma le saogalemu o le nofoaga e faia ai tui puipui o le fanau.

E pei ona silafia o le nofoaga i le fale failele tuai sa faia ai tuipuipui o fanau, ae o le taeao analeila na faaoga ai potu i totonu o le vaega e taunuu iai mai tigaina ma faalavelave faafuasei (outpatient). O le faamoemoe a’o tupu ane se faafitauli a’o o loo iai uma foma’i i lea vaega o le maotagasegase.

Na vaaia foi le faatali pea o fanau i le mae’a ai o tuiga, pe a ma se afa itula ina ia va’avaai pe iai se faaletonu i le tui ma ni a’afiaga e tutupu ai. O loo ua faagasolo lava fo’i le fa’atalanoaina o tina e tusa ai o le pepa e tatau ona sainia, pe afai e malie e fa’atino le tui i lana tama, ae afai e leai e le faamalosia e le matagaluega lea tulaga.

O lenei faiga ua toe amatalia ai le tui puipui o le MMR, e mafua mai lava ina ua uma ai le ola o fanau pepe e toalua i le falemai i Safotu i le tausaga ua mavae, ma o loo masalomia ai se faaletonu i le auaunaga, o loo faagasolo taualumaga a le faamasinoga i lea mataupu, ae mo le matagaluega ma le tulaga toe amatalia ai o lea tui mo le puipuia o fanau mai le Misela ma Rupela na taua e le Ofisa Sili o Pulega o le Matagaluega o le Soifua Maloloina ia Leausa Dr Take Naseri, ua tutūaai lava le aufaigaluega ina ia mautinoa e le toe tupu se fa’afitauli fa’apea i alo ma fanau a le atunuu.

By : Maina Misa Fomai Papalii-Vai

LOABAY NEWSLINE 

 

More from ALL FEATURED LOABAY SAMOA-PACIFC NEWSLINE

---