Maliu se taulealea i se agaese; faalavelave tulai mai i Siumu

O le faalavelave a tulai mai Siumu i le vaiaso nei, lea na maliu ai se talavou e 21 tausaga le matua i se agaese, ina ua faaoo iai e le isi foi taulealea o loo ua taofia nei e Leoleo le oti.

O se faalavelave na taua e se tasi molimau e leo fia taua lona suafa, o le aiga o le na faatupu le faalavelave, o se mea e ofo ai le toatele, pe a mafaufau i tupulaga nei o se uo, e le o ni tagata e iai ni uiga faatupu vevesi.

Sa faailoa foi o ia sa moe i le po lea o le aso Lulu, na te lei iloa se mea o tupu, ae o le fafagu o ia i luga pe tusa o le 5 ile vaveao e lo latou aiga e o e ave le ifoga i le aiga o le talavou ua maliu, na faatoa ia iloa ai loa le mea ua tupu.

Na ia faailoa o le ua maliu e faigaluega i le faletalimalo o le Coconut Beach Resort i Siumu lava, o i laua uma foi e mai i le itumalo lava lea e tasi.

O le fiafia night a le faletalimalo o le Sinalei e sosoo lava ma le Coconut Beach Resort, na agai iai e tafafao ai ina ua manava, o i tonu la ina ua faasuaava na mafua mai ai le faalavelave. O uiga o le ua maliu o se tagata le tautala ma e faapena foi i le na faaoo le oti.

https://youtu.be/7HK3GYA8cfo

Na talia e le aiga o le ua maliu le ifoga peitai e le avea lea ma tulaga e taofia ai le faatinoina o le matafaioi a le tulafono, e pei ona taofia ai nei le alii o loo masalomia na ia faaoo le oti, e le ofisa o leoleo e faatali ai lona tulai ai i luma o le faamasinoga e tali atu i ona moliaga.

Na faaalia e le molimau maeu le osofa’i a le tiapolo, i nei tupulaga lea ua tupu ai lenei faalavelave.

O se tulaga o loo aumai fa’afautuaga lava fo’i e le ofisa o leoleo tai le asa se vaiaso ona o tulaga nei i inugaava, ma le mafai ai ona fa’atonutonu folau e le tagata ia lava, ae ua pulea e le ava malosi, ma tulai mai ai loa vevesi ma faalavelave faapenei.

By : Maina Misa Fomai Papalii-Vai

LOABAY NEWSLINE 

More from ALL FEATURED LOABAY SAMOA-PACIFC NEWSLINE

---